తెలంగాణలో స్థానిక సంస్థల ఎన్నికల నిర్వహణకు ప్రభుత్వం సన్నద్ధమవుతోంది. పరిషత్ ఎన్నికలను ముందుగా నిర్వహించాలని నిర్ణయించిన ప్రభుత్వం, ఆ తర్వాత సర్పంచ్, మున్సిపల్ ఎన్నికలను నిర్వహించడానికి సన్నాహాలు చేస్తోంది. ఈ విషయాన్ని మంత్రి పొంగులేటి శ్రీనివాసరెడ్డి ప్రకటించారు. రెండు రోజుల క్రితం మంత్రి సీతక్క కూడా ఇదే విషయాన్ని వెల్లడించారు.
తెలంగాణలో పరిషత్, పంచాయతీ, మున్సిపల్ సంస్థల పదవీకాలం ముగిసి, ప్రస్తుతం ప్రత్యేకాధికారుల పాలనలో ఉన్నాయి. స్థానిక ఎన్నికల కోసం కాంగ్రెస్ కార్యకర్తలు కూడా ఆసక్తిగా ఎదురుచూస్తున్నారు. ఈ ఎన్నికలు జరిగితే వేల మంది కాంగ్రెస్ కార్యకర్తలకు పదవులు దక్కే అవకాశం ఉంది. అధికారంలో ఉన్నందున గెలుపు సులువు అవుతుందని కార్యకర్తలు విశ్వసిస్తున్నారు.
కాగా, బీసీ రిజర్వేషన్లు మరియు పథకాల అమలు వంటి కారణాలతో ప్రభుత్వం స్థానిక ఎన్నికలను వాయిదా వేస్తూ వచ్చింది. అయితే, ఈ సమస్యలు ఇంకా పరిష్కారం కాలేదు. అవి అలాగే కొనసాగుతాయని గ్రహించిన ప్రభుత్వం, ఇక ఎన్నికలు నిర్వహించక తప్పదని భావిస్తోంది. సోమవారం జరిగే క్యాబినెట్ సమావేశంలో దీనిపై నిర్ణయం తీసుకుని, వచ్చే నెలలో సర్పంచ్ ఎన్నికలను పూర్తి చేయాలని భావిస్తున్నారు. ఆ తర్వాత మున్సిపల్ ఎన్నికలు నిర్వహించనున్నారు.
more articles: https://bharatvarshatoday.com/